Venette ‘a na terra luntana
passanno pe’ mmare e tempeste
cu nu legno cu ‘e vvele ammainate
na guagliona cu nu ‘nnammurato

Sbarcava e purtava ll’ammore
dint”o core teneva passione
fantasia, arte e cultura
‘st’avventura nun faceva paura

Strignenno llu sposo a llu core
sunnava na terra tranquilla
cantava e traseva ‘int”e vvene
‘ncantava cu vvoce ‘e sirena

Mmiez”o mare ‘sti pprete pusaie
cu ll’ammore facette ll’ammore
e nascetta na terra ‘e canzone
addò ‘a gente venneva passione

Na casa, po’ n’ata e po’ ancora
cu ‘o tiempo crisceva ‘a città
case, puteche e sculture
che bellezza pe’ ddint”a ‘sti mmure

‘Sta guagliona venuta ‘a luntana
addeventa n’amata Riggina
rispettata da tutt”o paese
p”a legge ca scriveva p”a pace

Na granda Riggina mettette ‘sti pprete
na granda cultura, na bellezza infinita
Partenope è ‘o nomme d”a gloria
e partenopeie so’ ‘e figli ‘e ‘sta storia

Quantu tiempo è passato d’allora
nuie dint”e vvene purtammo ‘sta storia
e cantammo canzoni d’ammore
purtanno ‘sta guagliona dint”o core

Salvatore Mazzella